約翰二書

章 1

約翰二書

約二1:1 我 — 長老寫批互受揀選的夫人及你的子兒:我真心疼恁,呣若我,連所有認識真理的人嘛疼恁;,
Góa — tiúⁿ-ló siá-phoe hō͘ siū kéng-soán ê hu-jîn kap lí ê kiáⁿ-jî: Góa chin-sim thiàⁿ lín, m̄-nā góa, liân só͘-ū jīn-bat chin-lí ê lâng mā thiàⁿ lín;
約二1:2 因為真理踮佇咱內面,會永遠及咱同在。
in-ūi chin-lí tiàm tī lán lāi-bīn, ōe éng-oán kap lán tông-chāi.
約二1:3 願父上帝及父的子耶穌基督賜咱恩典、憐憫,及平安,互咱的生活充滿真理及仁愛!
Goān Pē Siōng-tè kap Pē ê Kiáⁿ Iâ-so͘ Ki-tok sù lán un-tián, lîn-bín, kap pêng-an, hō͘ lán ê seng-oa̍h chhiong-móa chin-lí kap jîn-ài!
約二1:4 我非常歡喜,因為我發現你的子兒中間有人遵趁父的誡命,實行真理。
Góa hui-siông hoaⁿ-hí, in-ūi góa hoat-hiān lí ê kiáⁿ-jî tiong-kan ū lâng chun-thàn Pē ê kài-bēng, si̍t-hêng chin-lí.
約二1:5 夫人啊,我要求你,咱著相疼。我啲寫互你的呣是新的誡命,是咱對起頭就領受的。
Hu-jîn ah, góa iau-kiû lí, lán tio̍h saⁿ-thiàⁿ. Góa teh siá hō͘ lí ê m̄-sī sin ê kài-bēng, sī lán tùi khí-thâu chiū niá-siū ê.
約二1:6 咱照上帝的誡命生活,就是疼。此個誡命是恁對起頭所聽著的,著照此個誡命生活。
Lán chiàu Siōng-tè ê kài-bēng seng-oa̍h, chiū-sī thiàⁿ. Chit-ê kài-bēng sī lín tùi khí-thâu só͘ thiaⁿ-tio̍h ê, tio̍h chiàu chit-ê kài-bēng seng-oa̍h.
約二1:7 有真多迷惑者已經來到此世間;怹呣公開承認耶穌基督做人來世間。此款人是迷惑者,是基督的敵對者。
Ū chin chōe bê-he̍k-chiá í-keng lâi kàu chit sè-kan; in m̄ kong-khai sêng-jīn Iâ-so͘ Ki-tok chòe lâng lâi sè-kan. Chit khoán lâng sī bê-he̍k-chiá, sī Ki-tok ê Te̍k-tùi-chiá.
約二1:8 著小心,恁所做的工才袂落空,反轉會得著充足的報賞。
Tio̍h sió-sim, lín só͘ chòe ê kang chiah bōe lo̍k-khong, hoán-tńg ōe tit-tio̍h chhiong-chiok ê pò-siúⁿ.
約二1:9 偏離無堅守基督教示的人無及上帝結連。堅守教示的人才有及父以及子結連。
Phian-lī bô kian-siú Ki-tok kà-sī ê lâng bô kap Siōng-tè kiat-liân. Kian-siú kà-sī ê lâng chiah ū kap Pē í-ki̍p Kiáⁿ kiat-liân.
約二1:10 若有人去恁遐,所傳違背此款的教示,呣通接納伊入恁的厝,嘛呣通給伊請安,
Nā ū lâng khì lín hia, só͘ thoân ûi-pōe chit khoán ê kà-sī, m̄-thang chiap-la̍p i ji̍p lín ê chhù, mā m̄-thang kā i chhéng-an,
約二1:11 因為給伊請安就是參與伊的歹行為。
in-ūi kā i chhéng-an chiū-sī chham-ú i ê pháiⁿ hêng-ûi.
約二1:12 我猶有真多話愛寫,呣拘無愛用紙筆;我較向望去恁遐,當面及恁講,通互咱的歡喜充滿。
Góa iáu ū chin chōe ōe ài siá, m̄-kú bô ài ēng chóa-pit; góa khah ǹg-bāng khì lín hia, tng-bīn kap lín kóng, thang hō͘ lán ê hoaⁿ-hí chhiong-móa.
約二1:13 及你平平受揀選彼個姊妹的子兒欲給你請安。
Kap lí pîⁿ-pîⁿ siū kéng-soán hit-ê chí-bē ê kiáⁿ-jî beh kā lí chhéng-an.

約翰二書

章 1

Please publish modules in offcanvas position.