路加福音

章 1 2 3 4 5 6 7 8 9 10 11 12 13 14 15 16 17 18 19 20 21 22 23 24

第一章 序言

  1所尊敬的提阿非羅先生:佇阮中間所發生的代誌,已經有真多人整理閣編寫;2諸個代誌是照許個對起頭就親目看見的人及傳道的人所傳授互阮的。

預告施洗者約翰的出世

  3諸個攏總的代誌,我有對頭到尾詳細查考,才想講著為著你照順序寫出來,4互你通明白所學習的道理是確實。5希律做猶太王的時,有一個亞比雅班的祭司,名叫做撒迦利亞;伊的某伊利莎白嘛是祭司亞倫的後代。6怹兩人完全遵守主一切的誡命及規例,互上帝看做義人。7怹無子,因為伊利莎白?生,怹兩人嘛攏已經真老。8有一日,撒迦利亞值班,佇上帝的面前執行祭司的職務。9照祭司職的規例,伊抽著鬮入去主的聖所燒香。10伊啲燒香的時,歸大陣民眾佇外面啲祈禱。11有主的一個天使顯現,徛佇香壇的正旁。12撒迦利亞一下看著真著驚,非常不安。13天使給伊講:「撒迦利亞,呣免驚,因為上帝已經聽著你的祈禱;你的某伊利莎白會給你生一個後生。你著給伊號名叫做約翰。14你會歡喜快樂;真多人嘛會因為伊的出世來歡喜,15因為伊佇主的面前會做大人物。薄酒厚酒伊攏?用得飲。伊猶佇母胎就互聖神充滿。16伊會互真多以色列的子孫歸向主 — 怹的上帝。17伊會用先知以利亞的精神及能力來做主的先鋒。伊會互父母及子兒和好,互背逆的人轉向來隨義人的意念,互子民準備便通迎接主。」18撒迦利亞對天使講:「我著按怎才會知此個代誌?我已經老,我的某嘛赫多歲啊。」19天使應講:「我是啲伺候上帝的加百列,受派來傳話,對你報此個好消息。20到諸個代誌應驗彼日,你會啞口呣講話,因為你無相信我所講時到會實現諸個話。」21彼時,民眾啲聽候撒迦利亞,怹真奇怪伊哪會入去聖所赫呢久。22伊出來的時煞?當對怹講話,怹才知伊佇聖所有看見異象。伊呣講話,一直對怹比手。23撒迦利亞服事的日期過了就轉去厝裡。24過無偌久,伊的某伊利莎白懷孕,五月日久無出門。25伊利莎白講:「主即呢看顧我,給我除去佇人面前的見笑。」

預告耶穌的出世

  26伊利莎白懷孕第六月日,天使加百列奉上帝差派到加利利一個城,叫做拿撒勒,27去見一個在室女,名叫做馬利亞。此個在室女已經及大衛家一個叫做約瑟的人定婚。28天使到馬利亞遐,對伊講:「平安!你是眾婦女中間上有福氣的;主及你同在!」29馬利亞因為諸個話非常不安,心內一直啲想此個請安是什麼意思。30天使對伊講:「馬利亞,呣免驚,因為你有得著上帝賜福。31你會懷孕生一個後生,你著給伊號名叫做耶穌。32伊會做大人物,人會稱呼伊做至高上帝的子。主上帝會將伊祖先大衛的王位互伊。33伊會永遠統治雅各的子孫;伊的王國無窮盡。」34馬利亞對天使講:「我猶未出嫁,哪會有此款代誌?」35天使應講:「聖神欲臨到你,至高上帝的權能欲致蔭你。因為按呢,彼個啲欲出世的嬰仔是聖的,人會稱呼伊做上帝的子。36你看,你的親成伊利莎白,伊雖然年老,嘛已經懷孕欲生一個後生。人講伊?生,呣拘伊已經有娠六月日。37因為上帝無一項代誌做?到。」38馬利亞講:「我是主的女婢,願照你的話佇我身上實現。」天使就離開伊

馬利亞訪問伊利莎白

  39過無偌久,馬利亞出發,趕緊去猶大山地的一個城。40伊入去撒迦利亞的厝,給伊利莎白請安。41伊利莎白聽著馬利亞的請安,腹肚內的嬰仔就趒跳。伊利莎白互聖神充滿,42大聲講:「婦仁人中你上受祝福!你腹肚內的囝仔嘛受祝福!43我的主的老母來訪問我,我哪會堪得?44因為我一下聽著你請安的聲,腹肚內的嬰仔就歡喜趒跳。45相信主講的話一定會實現彼個婦仁人真有福氣!」

馬利亞頌讚主

  46馬利亞講:我的心尊主做大;47我的神因為上帝 — 我的救主來歡喜。 48因為主有看顧伊卑微的女婢。對今以後,萬世代的人攏會講我有福氣,49因為全能的上帝為著我做偉大的代誌;伊的名是聖。 50對敬畏伊的人,伊憐憫怹到世世代代。 51伊伸出權能的手,趕散心驕傲的人。 52伊將掌權的對寶座拖落來,卑微的人給怹高升。 53枵餓的人,伊用好物互怹飽足;好額的人,伊趕怹空手出去。 54伊扶助伊的僕人以色列,記得給怹憐憫;55照伊對咱祖先的應允,憐憫亞伯拉罕及伊的子孫到永遠。 56馬利亞及伊利莎白做夥住差不多三月日,然後轉去怹兜。

施洗者約翰的出世

  57伊利莎白生產的日期已經到,就生一個後生。58厝邊及親族聽講主有大大憐憫伊,就及伊做夥歡喜。59囝仔出世第八日,怹來欲給伊割禮,閣照怹老父的名叫伊做撒迦利亞。60總是伊的老母講:「呣通!著給伊號名叫做約翰。」61怹對伊講:「恁親族中無人號此個名。」62怹就用手比,問囝仔的老父看欲給伊號什麼名。63撒迦利亞給怹討一塊寫字板,寫講:「伊的名是約翰。」大家攏著驚。64撒迦利亞隨時開嘴講話,稱讚上帝。65厝邊隔壁攏真著驚;全猶太的山地攏啲談論此項代誌。66聽著此項代誌的人想講:「此個嬰仔將來會成做什麼款人?」因為有主的權能及伊同在。

撒迦利亞的預言

  67約翰的老父撒迦利亞互聖神充滿,預言講: 68著稱讚主 —以色列的上帝!因為伊有看顧閣救贖伊的子民。 69伊對伊的僕人大衛的家,給咱設立一位有大氣力的拯救者。 70照伊佇古早通過伊聖先知的嘴應允講: 71伊欲拯救咱脫離咱的對敵,脫離一切怨恨咱的人的手。 72伊應允欲憐憫咱的祖先,閣記得伊所立神聖的約,73就是伊對咱的祖亞伯拉罕所立的約。伊欲救咱脫離對敵的手,互咱無驚惶,一世人佇伊的面前,用聖潔公義服事伊。 74【併入上節】75【併入上節】76細子啊,你會互人稱呼做至高上帝的先知;因為你會做主的先鋒來準備伊欲行的路,77互伊的子民因為罪得著赦免通明白上帝的拯救。 78因為咱的上帝溫柔慈悲;伊互清早的日頭對天頂照咱,79照咱諸個踮佇烏暗及死亡蔭影下的人,引導咱的腳行入和平的路。 80此個囝仔漸漸大漢,心靈日日勇壯。伊住曠野,一直到伊佇以色列人的中間公開出現彼日。

 

路加福音

章 1 2 3 4 5 6 7 8 9 10 11 12 13 14 15 16 17 18 19 20 21 22 23 24

Please publish modules in offcanvas position.