約翰福音

章 1 2 3 4 5 6 7 8 9 10 11 12 13 14 15 16 17 18 19 20 21

第一章 道成做人

  1創世以前就有道,道及上帝同在,道是上帝。2伊佇創世以前就及上帝同在。3上帝通過伊來創造萬有;一切被造的逐項攏是通過道來創造。4佇伊內面有活命;此個活命是人類的光。5此個光佇烏暗中啲照,烏暗呣曾贏過光。(11.5「烏暗呣曾贏過光」 嘛通譯做 「烏暗呣接納光」。 )6有上帝差來的一個人,名叫做約翰。7此個人來是欲作證,為著光作證,欲互所有的人通過伊來信。8伊本身呣是彼個光,是欲為著彼個光作證。9有真的光進入世間來照全人類。(21.9此節嘛通譯做 「啲照全人類的真光來到世間。」 )10伊佇世間;世間通過伊來創造,呣拘世間呣識伊。11伊來到家己的所在,家己的人無接納伊。12許個接納伊的,就是信伊的人,伊賜怹有權成做上帝的子兒。13怹呣是對血統,呣是對肉慾,嘛呣是對查甫人的意念,是對上帝生的。14道成做人,踮佇咱中間,充滿恩典及真理;阮有看見伊的榮耀,是天父獨一的子才有的榮耀。15約翰為著伊作證,喝講:「此位就是我曾給恁講的,伊佇我後面啲來,卻比我較大;因為我猶未出世,伊就存在。」16對伊的豐富咱攏領受恩典,恩上加恩。17律法通過摩西頒布;恩典及真理是通過耶穌基督來的。18無人曾看見上帝,只有父心懷中獨一的子有給伊顯示出來。

施洗者約翰的見證

  19以下是約翰的見證:耶路撒冷的猶太教當局派祭司及利未人去問約翰的時,講:「你是什麼人?」20伊無拒絕回答,公開聲明「我呣是基督」。21怹閣問伊:「若按呢,你是以利亞是無?」約翰應講:「我呣是。」 怹閣問:「你是彼位先知是無?」約翰應講:「呣是。」22怹就給伊講:「按呢你是什麼人?請給阮講,互阮通回答派阮來的人。你講,到底你是什麼人?」23約翰引用先知以賽亞的話,講:我就是佇曠野啲喝的聲,講:著為主修直道路。 24許個人是法利賽派的人差來的。25怹閣問約翰,講:「你若呣是基督,呣是以利亞,嘛呣是彼位先知,你是按怎給人洗禮?」26約翰應講:「我用水給人洗禮;呣拘有一位恁呣識的徛佇恁中間。27伊佇我後面啲來,我連給伊解鞋帶都?堪得。」28諸個事佇約旦河東岸的伯大尼發生,約旦河就是約翰啲給人洗禮的所在。

上帝的羊羔

  29隔日,約翰看著耶穌行倚來,就講:「恁看,上帝的羊羔,伊欲除去世間人的罪。30關係伊的代誌,我曾給恁講,伊比我較慢來,總是比我較大,因為我猶未出世,伊就存在。31我家己嘛呣識伊,呣拘我來用水給人洗禮,是欲互以色列人認識伊。」32約翰閣作證,講:「我有看著聖神親像粉鳥對天降落來,歇佇伊頂面。33我家己嘛呣識伊,呣拘差我用水給人洗禮彼位上帝有對我講:『你看著聖神降落來歇佇伊頂面彼個,伊就是欲用聖神給人洗禮彼位。』34我有看著,閣作證,此位就是上帝的子。」

耶穌呼召頭一批門徒

 35隔日,約翰閣及伊兩個門徒徛佇遐;36伊看著耶穌經過,就講:「恁看,上帝的羊羔!」37此兩個門徒聽著伊按呢講,就去隨耶穌。38耶穌越過來,看著怹啲隨伊,就問怹:「恁啲尋什麼?」 怹給伊講:「拉比,你住叨位?」拉比的意思是老師。39耶穌給怹講:「恁來看!」怹就去看耶穌住的所在,彼日及伊做夥住。彼時大約下晡四點。40聽約翰的話來隨耶穌彼兩人,一個是西門‧彼得的小弟安得烈。41伊先去尋伊的兄哥西門,對伊講:「阮已經有抵著彌賽亞。」彌賽亞的意思是基督。42伊就導西門去見耶穌。 耶穌注目給伊看,講:「你是約翰的子西門,我欲給你叫做磯法。」磯法及彼得像意思,就是石磐。

耶穌呼召腓力及拿但業

  43隔日,耶穌決定欲去加利利。伊抵著腓力,對伊講:「來隨我!」44腓力是伯賽大人,安得烈及彼得的同鄉。45腓力抵著拿但業,對伊講:「摩西佇律法書所寫,以及先知所記載彼位,阮已經有抵著,就是約瑟的子拿撒勒人耶穌。」46拿但業應講:「拿撒勒彼款所在豈會出什麼好物?」 腓力給伊講:「你來看!」47耶穌看著拿但業行倚來,就講:「恁看,伊是真正的以色列人,攏無虛假!」48拿但業問耶穌:「你哪會識我?」 耶穌給伊講:「腓力猶未叫你,我就看著你佇彼欉無花果樹腳。」49拿但業應講:「拉比,你是上帝的子!你是以色列的王!」50耶穌應講:「因為我給你講我有看著你佇彼欉無花果樹腳,你就信噢?你會看著比這閣較大的事。」51耶穌閣給伊講:「我實實在在給恁講,恁會看見天開,上帝的天使佇人子的身上上落往來。」

 

約翰福音

章 1 2 3 4 5 6 7 8 9 10 11 12 13 14 15 16 17 18 19 20 21

Please publish modules in offcanvas position.