哥林多後書

章 1 2 3 4 5 6 7 8 9 10 11 12 13

第一章

  1我是保羅,奉上帝的旨意作基督耶穌的使徒。我及兄弟提摩太寫批互佇哥林多上帝的教會及全亞該亞省所有信徒。2願咱的父上帝及主耶穌基督賜恁恩典及平安!

保羅患難後的感恩

  3著稱讚咱的主耶穌基督的父上帝!伊是慈悲的父,賜逐項安慰的上帝。4佇咱一切的患難中,伊安慰咱,互咱會當用上帝賜咱的安慰去安慰許個抵著逐款患難的人。5因為基督為著咱受真多苦難,咱嘛通過基督受赫呢多的安慰。6阮若抵著患難,是欲互恁得著安慰及拯救;阮若得著安慰,嘛是欲互恁得著安慰,有氣力通忍受及阮所忍受像款的苦難。7阮對恁的向望袂搖動;因為阮知,恁及阮同受苦,恁嘛會及阮同受安慰。8兄弟姊妹,阮愛恁知阮佇亞西亞省所抵著的患難。阮所擔的重擔非常重,重甲擔袂起,致到強欲活呣落去。9阮家己感覺有受判死刑;按呢是欲互阮無閣倚靠家己,只有倚靠互死人復活的上帝。10伊有救阮脫離死的危險,嘛會繼續救阮。阮向望伊將來會閣救阮。11恁嘛著用祈禱來幫贊阮,按呢就有真多人會因為阮對恁真多的祈禱得著祝福來感謝上帝。

保羅改變計劃

  12阮所誇口的是按呢:阮的良心證明,阮佇此世間的生活攏是照上帝所賜的純潔及誠實,呣是靠屬世的智慧,是靠上帝的恩典;阮對待恁閣較是按呢。13阮寫互恁的攏是恁會曉讀會當了解的。恁到今所理解的只有一部份,我向望恁到路尾會完全了解。按呢,佇咱的主耶穌的日,恁會做阮的誇口,阮嘛做恁的誇口。14【併入上節】15因為有此個確信,我才計劃先去訪問恁,通互恁得著加倍的祝福;16就是計劃去馬其頓的路中先去訪問恁,閣對馬其頓倒來經過恁遐的時,互恁通送我出發去猶太。17此個計劃豈是凊採做的?我做此款計劃豈出佇自私的動機,連鞭講「是」連鞭講「呣是」?18上帝是信實,我對恁答應的話就呣是連鞭「是」連鞭「呣是」。19因為西拉、提摩太,及我傳互恁彼位上帝的子耶穌基督並呣是連鞭「是」連鞭「呣是」的。在佇耶穌基督只有「是」若定。20上帝一切的應允在佇耶穌基督成做「是」,所以咱才通過伊講「阿們」來歸榮光互上帝。21互阮及恁來及基督結連閣選派阮的是上帝。22伊給阮蓋印,閣賜聖神佇阮心內做保證。23我用家己的性命懇求上帝給我作證。我是體貼恁才無去哥林多。24阮呣是啲強制恁著信什麼,反轉是啲做恁的同工,互恁通歡喜,因為恁的信心有徛在。

 

哥林多後書

章 1 2 3 4 5 6 7 8 9 10 11 12 13

Please publish modules in offcanvas position.