約翰二書

章 1

第一章  請安

  1我 — 長老寫批互受揀選的夫人及你的子兒:我真心疼恁,呣若我,連所有認識真理的人嘛疼恁;2因為真理踮佇咱內面,會永遠及咱同在。3願父上帝及父的子耶穌基督賜咱恩典、憐憫,及平安,互咱的生活充滿真理及仁愛!

真理及仁愛

  4我非常歡喜,因為我發現你的子兒中間有人遵趁父的誡命,實行真理。5夫人啊,我要求你,咱著相疼。我啲寫互你的呣是新的誡命,是咱對起頭就領受的。6咱照上帝的誡命生活,就是疼。此個誡命是恁對起頭所聽著的,著照此個誡命生活。7有真多迷惑者已經來到此世間;怹呣公開承認耶穌基督做人來世間。此款人是迷惑者,是基督的敵對者。8著小心,恁所做的工才袂落空,反轉會得著充足的報賞。9偏離無堅守基督教示的人無及上帝結連。堅守教示的人才有及父以及子結連。10若有人去恁遐,所傳違背此款的教示,呣通接納伊入恁的厝,嘛呣通給伊請安,11因為給伊請安就是參與伊的歹行為。

最後的話

  12我猶有真多話愛寫,呣拘無愛用紙筆;我較向望去恁遐,當面及恁講,通互咱的歡喜充滿。13及你平平受揀選彼個姊妹的子兒欲給你請安。

 

約翰二書

章 1

Please publish modules in offcanvas position.