以弗所書

章 1 2 3 4 5 6

第一章

  1我是保羅,奉上帝的旨意作基督耶穌的使徒;我寫批互住佇以弗所,屬基督耶穌忠信的信徒。2願咱的父上帝及主耶穌基督賜恁恩典及平安!

通過基督得著屬靈的福氣

  3著稱讚咱的主耶穌基督的父上帝!因為伊有將天頂逐款屬靈的福氣,通過咱及基督結連,賜互咱。4創世以前,上帝已經通過基督揀選咱,互咱佇伊面前成做聖潔無缺點的人。 因為上帝疼咱,5早就決定欲通過耶穌基督互咱作伊的子兒歸伊;這是伊所歡喜的,是伊的旨意。6咱著頌讚上帝榮耀的恩典,因為伊有將伊所疼的子無條件賜互咱!7對基督,通過伊的死,咱得著自由,罪過得著赦免。上帝的恩典實在真豐富;8伊有將此個恩典充充足足賜互咱。伊用逐款的智慧及理解,9照伊所歡喜的旨意,互咱知伊早就決定通過基督來完成奧妙的計劃。10此個計劃,上帝欲佇時機成熟的時完成,通互佇天頂及地上一切的被造物攏尊基督作頭,聯合做一個。11萬有攏照上帝的計劃及決定來完成。上帝照伊代先決定的旨意,通過基督揀選阮來承接伊的家業。12按呢是欲互阮諸個代先將向望囥佇基督的人通頌讚上帝的榮耀。13通過基督,恁嘛有聽著真理的信息,就是彼個互恁得救的福音,彼時恁有信,上帝就賜恁所應允的聖神,給恁蓋印證明恁屬伊。14聖神保證咱通承接上帝所應允的家業,直到互屬伊的人得著完全的自由,通頌讚伊的榮耀。

保羅的祈禱

  15因為按呢,我一下聽著恁對主耶穌有信心,對所有的信徒有疼心,16就為著恁不時啲感謝上帝。我佇祈禱中數念恁,17祈求咱的主耶穌基督的上帝,榮耀的天父,賜聖神互恁有智慧及啟示通認識伊。18我懇求上帝開恁的心眼,互恁通知伊選召恁來得著的向望是什麼。伊對伊的信徒所應允的祝福偌呢豐富,19佇咱信伊的人中間啲運行的權能偌呢大。伊有運用此個氣力互基督對死人中復活,閣互基督佇天頂坐佇伊家己的正旁,20【併入上節】21佇遐超越所有的統領者、掌權者、權力者、主政者,以及一切現在及將來會當稱呼的銜頭。22上帝互萬有攏屈服佇基督的腳下,互伊作教會的元首,統治萬有。23教會是基督的身體,是充滿萬有的基督所完全充滿的。(11.23「是充滿…充滿的」 嘛通譯做 「是互上帝完全充滿彼位基督所充滿的」。 )

 

以弗所書

章 1 2 3 4 5 6

Please publish modules in offcanvas position.