歌羅西書

章 1 2 3 4

第一章 請安

  1我是保羅,奉上帝的旨意作基督耶穌的使徒;我及咱的兄弟提摩2寫批互住佇歌羅西的信徒,就是及基督結連忠信的兄弟姊妹。 願咱的父上帝賜恁恩典及平安!

感謝的祈禱

  3阮為著恁祈禱的時不時啲感謝咱的主耶穌基督的父上帝,4因為有聽著恁對基督耶穌有信心,對所有的信徒有疼心。5諸個攏是用彼個為著恁囥佇天頂的向望做根據;此個向望當初福音真道傳互恁的時,恁已經有聽著。6此個福音呣若傳到恁遐,嘛傳到全世界,繼續成長結果子,抵及恁以前聽見閣真正認識上帝的恩典彼時的情形仝款。7恁有對親愛的以巴弗學習此個福音;伊及阮平平作奴僕,為著恁做基督忠實的差用,8嘛有對阮講起聖神互恁有疼心的事。9因為按呢,對聽著恁的消息以後,阮有繼續啲為著恁祈禱,求上帝互恁會當對聖神得著逐款的智慧及理解,充分明白伊的旨意,10言行舉止照主所愛,凡事互伊歡喜,閣互恁做逐項好事,結好果子,對上帝的認識嘛愈加添。11願恁對伊榮耀的權能得著夠額的氣力,有耐心通忍受一切,閣用歡喜的心感謝天父,因為伊互恁會堪得分享伊為著家己的信徒保留佇光明國度的福氣。12【併入上節】13伊救咱脫離烏暗的權勢,給咱徙入去伊所疼的子的國度;14咱對伊的子得著救贖,罪得著赦免。

基督及伊的工作

  15基督是看袂著的上帝的形像:伊是大子,比一切受造的較早有。16因為上帝通過伊來創造萬有,就是佇天頂及地上,看會著的及看袂著的,靈界坐王位的及主政者,統領者及掌權者。上帝通過伊,也為著伊,創造萬有。17猶未有萬有以前伊就存在,萬有靠伊連結好勢。18伊是教會,就是伊的身軀的頭。伊是元始,是大子;上帝互伊成做頭一個對死人中復活的,通佇萬有中成做第一。19因為上帝照家己的旨意,將家己完整的特性充滿佇伊內面。 20通過伊的子,上帝互萬有,無論佇天頂抑是地上,攏及伊和好;上帝通過伊的子佇十字架頂流血死來促成和平。 21恁咧,恁有一時及上帝斷絕關係,心思及伊敵對,做歹代誌。22呣拘現在,上帝已經通過家己的子肉體的死,互恁及伊和好,成做聖潔,無缺點,無通嫌的祭物獻佇伊面前。23恁著堅持信仰,堅固徛在,互恁聽著福音的時所得著的向望無動搖。此個福音已經傳互天下所有的被造物;我 —保羅就是此個福音的差用。

保羅作教會的差用

  24今我為著恁受苦感覺真歡喜;因為我肉體的受苦是啲完成基督為著伊的身軀,就是教會,受猶未了的苦難。25我作教會的差用;我對上帝領受的任務是為著恁,欲將伊的信息完全傳開。26此個信息是歷代以來對人類所隱密的奧祕,現在已經對伊的信徒顯明。27上帝欲互怹知影,伊為著外邦人所準備的奧祕是偌呢豐富閣榮耀。此個奧祕是基督佇恁內面,伊是恁分享上帝榮耀的向望。28所以,阮對所有的人宣揚基督,用逐款的智慧來勸誡閣教示眾人,通互所有佇基督內面成做成熟的人獻互上帝。29為著此個目的,我靠基督佇我內面運作的大能力盡力啲拍拼。

歌羅西書

章 1 2 3 4

Please publish modules in offcanvas position.