提多書

章 1 2 3

第一章

  1我是保羅,作上帝的奴僕及耶穌基督的使徒,受選派幫贊上帝選民的信仰,互怹認識合佇敬虔的真理;2此個真理互咱對永遠的活命有向望,就是袂講白賊的上帝佇萬世以前應允欲互咱的。3伊佇時機成熟的時,通過信息的宣講將此個應允顯明出來。我有受託,奉咱的救主上帝的命令宣講此個福音。4提多,我寫批互你,佇咱共同的信仰你是我真的子。願父上帝及咱的救主基督耶穌賜你恩典及平安!

提多佇克里特的工作

  5我給你留佇克里特,是欲互你處理猶未辦清楚的代誌,閣照我所指示,佇逐個城市任命人做長老。6作長老的著無通指責,只有一個某,子兒攏是信徒,閣無人控告是放蕩抑是呣順服。7教會的監督,既然作上帝的管家,一定著無通指責,無自高,無歹性地,無酒醉,無兇暴,無貪財。8著哿款待出外人,哿做好事,守己,正直,聖潔,節制。9伊著堅守彼個可靠符合教義的信息,按呢才會當用健全的教示勸勉人,辯倒反對的人。10因為有真多呣順服的人,特別是許個主張著受割禮的人,怹愛講無路用的話,閣欺騙人。11此款人一定著禁止怹講話,因為怹為著欲貪不義的錢財,用無應該教示的話破壞一寡家庭。12怹克里特人的一個先知曾按呢講:「克里特人愛講白賊,是兇惡的野獸,貪食閣貧憚。」13伊講的是事實。所以你著嚴格給怹責備,通互怹有健全的信仰,14無聽趁猶太人無影跡的傳說及背逆真理的人的規例。15對清氣的人來講,一切攏清氣;呣拘對污穢及呣信的人來講,無一項是清氣,因為怹的心思及良知攏是污穢。16怹公開講識上帝,卻用行為否認伊。怹可惡,背逆,袂當做什麼好事。

提多書

章 1 2 3

Please publish modules in offcanvas position.