腓利門書

章 1

第一章

  1我是保羅,作基督耶穌的囚犯;我及咱的兄弟提摩太寫批互阮所疼的同工腓利門、2阮的姊妹亞腓亞、阮的戰友亞基布,以及佇你的厝啲聚會的教會。3願咱的父上帝及主耶穌基督賜恁恩典及平安!

腓利門的疼心及信心

  4我逐遍祈禱的時攏有想著你,常常感謝我的上帝;5因為我有聽著你對上帝所有的子民有疼心,對主耶穌有信心。6我懇求上帝,通過阮及恁分享信仰,會當促進對咱及基督結連所得著一切的祝福有較深的了解。7兄弟啊,你的疼心有互我真大的歡喜及鼓勵!上帝的子民攏有對你得著激勵。

為阿尼西謀祈求

  8我靠基督雖然會當好膽命令你做應該做的代誌,9呣拘,因為疼的緣故我寧可給你求。我 —保羅已經年老,(19「我 —保羅已經年老」 嘛通譯做 「我 —保羅是大使」。 )現在猶是基督耶穌的囚犯。10我替阿尼西謀給你求,伊是我關監的時所生的。11伊以前對你攏無路用,現在對你對我攏真有路用。(211「阿尼西謀」 的意思就是 「有路用」。 )12現在我送伊轉去你遐;伊是我所疼惜的。13我原來想欲給伊留佇身邊,通佇我為著福音做囚犯的中間替你服事我;14呣拘無你的同意,我按呢做較好,互你所做的好事呣是勉強,是甘心樂意。15豈採因為按呢,阿尼西謀著暫時離開你,是欲互你永久給伊留啲;16無閣是奴隸,身份超過奴隸,是所疼的兄弟。對我來講特別是按呢,對你來講閣較是按呢;伊呣若是你家內的人,嘛是主內的兄弟。17所以,你若看我做同伴,就著親像接納我按呢給伊接納。18伊若有對你做什麼呣著,抑是有欠你什麼,算我的賬。19我 —保羅親手寫:我負責還。我應該呣免給你提醒,你欠我的是你本身。20是啦,兄弟,因為主的緣故,給我鬥相共一下,互我的心靠基督得著激勵。21我寫批互你,因為確信你會聽我的要求;其實,我知你會做比我講的閣較多。22嘛著給我準備一間房間,因為我向望上帝會聽恁的祈禱,互我會當去恁遐。

最後的請安

  23為著基督耶穌及我同作囚犯的以巴弗欲給恁請安。24我的同工馬可、亞里達古、底馬、路加嘛欲給恁請安。25願主耶穌基督的恩典及恁的心靈同在!

腓利門書

章 1

Please publish modules in offcanvas position.