希伯來書

章 1 2 3 4 5 6 7 8 9 10 11 12 13

第一章  上帝通過伊的子對咱講話

  1上帝佇古早有通過伊的眾先知,真多遍,用真多方式對咱的祖先講話,2呣拘佇終末的日子,通過伊的子對咱講話。上帝有指定伊作萬有的繼承人,閣有通過伊創造宇宙。3伊反射上帝的榮耀,是上帝本質的真像。伊用伊權能的話扶持萬有,洗除人的罪了後,坐佇至尊至高上帝的正旁。

子比天使較偉大

  4上帝有賜子比眾天使較尊貴的名,互伊成做比天使較偉大。5上帝豈曾對叨一個天使講:你是我的子,我今仔日生你?閣伊豈曾對叨一個天使講:我欲做伊的父,伊欲做我的子? 6閣上帝差遣伊的大子入世間的時,伊講:上帝所有的天使攏著拜伊。 7關係天使,伊講:上帝用風做伊的天使,用火焰做伊的差用。 8呣拘關係子,伊講:上帝啊,你的寶座永永遠遠存在;你的國度的權柄是正直的權柄。 9你意愛公義,怨恨不法。所以,上帝 — 你的上帝揀選你,用歡喜的油抹你,超過抹你的同伴。10伊閣講:主啊,你佇起初有建立地的根基;天嘛是你的手所造。11天地攏會消失,呣拘你永遠存在。天地攏會親像衣服漸漸舊,12你會親像捲外衫給怹捲起來;怹會親像衣服改變。呣拘你永遠袂改變;你的歲壽無窮盡。13上帝豈曾對叨一個天使講:你坐我的正旁,聽候我互你的對敵屈服佇你腳下?14天使豈呣是攏啲服事的神,受差派去服務啲欲領受拯救的人?

 

希伯來書

章 1 2 3 4 5 6 7 8 9 10 11 12 13

Please publish modules in offcanvas position.