啟示錄

章 1 2 3 4 5 6 7 8 9 10 11 12 13 14 15 16 17 18 19 20 21 22

第一章

  1這是耶穌基督的啟示。上帝互伊此個啟示,愛伊將一定隨時會發生的代誌指示上帝的眾奴僕。基督有差遣伊的天使去指示伊的奴僕約翰。2約翰為著上帝的信息及耶穌基督的見證,就是伊所看見的一切,攏作證。3讀此本冊的人真有福氣;聽見此個預言閣遵守冊裡所記載的人真有福氣;因為時機近啦。

對七個教會請安

  4我 —約翰寫批互亞西亞的七個教會,講: 願現在存在、過去存在、將來嘛存在的上帝,及伊座位前的七個神,以及耶穌基督,賜恁恩典及平安!基督是忠信的見證人,頭一個對死人中復活,是地上萬王的主宰。 伊疼咱,為著咱流血犧牲來解放咱脫離罪,5【併入上節】6互咱成做一個國度,作祭司來服事伊的父上帝。願榮光及權能歸佇耶穌基督,直到永永遠遠。阿們! 7你看,伊坐雲啲來,眾人會看見伊,連用槍鑿伊的人嘛會看見。地上萬族攏會因為伊啼哭。此個事一定會發生。阿們! 8現在存在、過去存在、將來嘛存在的全能者 — 主上帝講:「我是阿爾法,是亞米茄。」(11.8「阿爾法」 及 「亞米茄」 是希臘字母的頭一字及路尾字,代表 「起頭」 及 「煞尾」。 )

基督對約翰顯現

  9我是約翰,是恁的兄弟,及恁做夥分擔耶穌的患難及吞忍,閣有份佇伊的統治。為著傳上帝的信息及見證耶穌,我曾住佇一個名叫拔摩的海島。10有一個主日,我受聖神感動,聽見佇我的後面有大的聲親像喇叭啲響,11講:「你著將所看見的寫做冊,寄互以弗所、士每拿、別迦摩、推雅推喇、撒狄、非拉鐵非,及老底嘉此七個教會。」12我越轉身欲看對我講話的是什麼人,一下越轉身有看著七支金燈台。13燈台的中央有一位親像人子,穿一領垂落到腳的長袍,胸坎縖金帶。14伊的頭及頭毛親像羊毛赫呢白,親像雪赫呢白;伊的目睭親像火焰。15伊的腳親像過火爐鍛鍊光亮的銅;伊的聲親像大水啲瀧的聲。16伊的正手提七粒星;伊的嘴吐出雙面利的劍;伊的面親像炎熱的日頭發光。17我一下看著伊,就仆佇伊腳前親像死去的人。伊用正手按我,講:「呣免驚!我是起頭的,嘛是煞尾的。18我是活的。我有死,現在啲活,會永永遠遠活啲。我有死亡及陰府的鎖匙。19所以,你著將所看見的,以及現今所啲發生,及以後會發生的代誌攏寫起來。20你所看著我正手提彼七粒星及七支金燈台的奧妙是按呢:七粒星是七個教會的天使;七支燈台是七個教會。」

 

啟示錄

章 1 2 3 4 5 6 7 8 9 10 11 12 13 14 15 16 17 18 19 20 21 22

Please publish modules in offcanvas position.