馬可福音

1 2 3 4 5 6 7 8 9 10 11 12 13 14 15 16

第一章 施洗者約翰的傳道

1上帝的子 (11.1有的抄本無 「上帝的子」 此句。 )耶穌基督的福音按呢開始。2先知以賽亞的冊有記載: 上帝講: 看啊,我差我的使者做你的先鋒,伊欲給你開路。 3有聲佇曠野啲喝: 著為主準備道路,為著伊修直小路。 4果然,約翰佇曠野出現,給人洗禮,宣揚講:「著悔改,領受洗禮,上帝就赦免恁的罪。」5猶太逐所在有真多人及耶路撒冷所有的人攏出來,去約翰遐,告白家己的罪,佇約旦河對伊領受洗禮。6約翰穿駱駝毛的衫,腰縖皮帶,食草蜢及野蜜。7伊宣揚講:「有一位比我較有權能的佇我後面啲來,我連踞落去給伊解鞋帶都?堪得。8我用水給恁洗禮,呣拘伊欲用聖神給恁洗禮。」

耶穌領受洗禮

9過無幾日,耶穌對加利利的拿撒勒來,佇約旦河對約翰領受洗禮。10耶穌一下對水裡起來,就看見天裂開,聖神親像粉鳥降落佇伊身上。11閣對天有聲講:你是我所疼的子,你,我真意愛。

耶穌受試探

12聖神隨時催迫耶穌去曠野。13伊佇曠野四十日久受撒旦試探;伊一直攏及野獸做夥,呣拘有天使啲給伊伺候。

耶穌呼召四個掠魚的

14約翰受掠了後,耶穌去加利利宣揚上帝的福音,15講:「時機到啊,上帝的主權啲欲實現啦,著悔改,信福音。」16耶穌對加利利湖邊經過的時,看著西門及伊的小弟安得烈佇湖裡啲拋網,因為怹是掠魚的。17耶穌對怹講:「來隨我,我欲互恁得著人親像掠魚的得著魚。」18怹隨時給網放咧,去隨耶穌。19行無偌遠,耶穌看著西庇太的子雅各及伊的小弟約翰佇船頂啲整理網。20伊隨時呼召怹,怹就將老父西庇太及倩的工人放佇船頂,隨耶穌去。

耶穌醫好邪神附身的人

21耶穌及伊的門徒到迦百農;安息日一下到,伊隨時入去會堂教示。22眾人對伊的教示感覺非常希奇,因為伊的教示真有權威,及經學教師無相像。23彼時,會堂內有一個邪神附身的人雄雄喝出來:24「拿撒勒人耶穌,你插阮!你來欲毀滅阮是無?我知你是什麼人;你是上帝的聖者。」25耶穌給伊責備講:「恬恬!對此個人出去!」26邪神互彼個人抽惙,大聲喝一聲,就對伊出去。27眾人著驚,議論紛紛講:「這是什麼代誌?是有權柄的新教示!伊命令邪神,怹攏降服。」28耶穌的名聲隨時傳到加利利及周圍逐所在。

耶穌醫好真多病人

29耶穌一下離開會堂,隨時導雅各及約翰去西門及安得烈怹兜。30西門的丈姆抵啲發熱,倒佇眠床,怹隨時將伊的情形給耶穌講。31耶穌行倚去牽伊的手,給伊扶起來;伊的熱退去,就給怹伺候。32黃昏,日落的時,眾人將逐種病人及鬼附身的人攏導來耶穌遐。33通城的人攏聚集佇門口。34耶穌醫好真多患著逐款病的人,閣趕出真多鬼。伊呣准鬼講話,因為怹知伊是什麼人。

耶穌佇加利利傳道

35隔日透早,天猶未光,耶穌就起來,出去偏僻無人住的所在,佇遐祈禱。36西門及同伴去尋伊。37怹尋著就給伊講:「逐個攏啲尋你。」38耶穌應講:「咱來去附近的庄社,我嘛通佇遐傳道,因為這是我出來的目的。」39耶穌去加利利逐所在,佇怹的會堂傳道閣趕鬼。

耶穌醫好痲瘋病人

40有一個痲瘋病人來懇求耶穌,跪落去對伊講:「你若肯,會當互我清氣。」41耶穌滿心憐憫,伸手給伊摸,講:「我肯,互你清氣!」42伊的痲瘋隨時無去,伊就清氣。43耶穌隨時叫伊離開,嚴嚴給伊吩咐,44講:「千萬呣通給人講。不過你著去互祭司驗,閣照摩西的規定為著你有得著清氣獻祭物,通對眾人證明。」45呣拘,伊一下出去就四界宣傳報揚此個消息,致到耶穌?當公開入城,煞著住佇城外偏僻的所在。眾人猶原對逐所在去尋伊。

 

馬可福音

1 2 3 4 5 6 7 8 9 10 11 12 13 14 15 16

Please publish modules in offcanvas position.