雅各書

章 1 2 3 4 5

第一章

  1我 —雅各是上帝及主耶穌基督的奴僕,欲給所有分散佇逐所在上帝的子民請安。

信心及智慧

  2兄弟姊妹,恁抵著逐款試煉的時,著想做是通歡喜的代誌,3因為知影恁的信心經過考驗會產生忍耐。4恁著忍耐到路尾才會當達到完全閣完整,攏無缺點。5恁中間若有人欠缺智慧,著對上帝祈求,伊會賜互恁,因為上帝會真慷慨無保留賜互攏總的人。6不過,恁著靠信心祈求,呣通憢疑;憢疑的人親像海湧互風掃,起起落落。7此款人三心兩意,所做無定性,免想欲對主得著什麼。

散赤及富裕

  8【併入上節】9散赤的兄弟姊妹得著上帝提升,著歡喜;10富裕的人受上帝降低,嘛著歡喜。富裕的人會親像草花謝去。11日頭一下出,燒風一下吹,草焦去,花謝去,伊的媠就消失。富裕的人嘛是按呢,會佇無閒奔波的中間消失。

試煉及引誘

  12忍受試煉的人真有福氣;因為伊有經過考驗,會領受上帝應允互疼伊的人活命的花冠。13人受引誘的時,呣通講:「我互上帝引誘。」因為上帝呣受邪惡誘惑,伊家己嘛呣引誘人。14人受引誘,是互家己的慾望引誘陷害。15慾望懷孕就生出罪惡;罪惡成熟就產生死亡。16親愛的兄弟姊妹,呣通受欺騙。17一切美好的賞賜及一切完全的恩賜是對天頂光明的源頭所賜。伊無改變,嘛無天體轉踅引起的影。18伊照家己的旨意用真理的道來造咱,互咱佇受造的萬物中有上重要的地位。

聽及實行

  19親愛的兄弟姊妹,著知!逐個人著急欲聽;呣通急欲講;呣通急欲受氣;20因為人的受氣袂當實現上帝公義的要求。21所以,著消除一切垃墋的習慣及貫滿的邪惡;著用溫柔的心接納彼個種佇恁心內會當救恁的道。22著實行道理,呣通騙家己講干單聽道理就好。23若有人聽道理無實行,伊親像人照鏡看家己的面相,24詳細看了後,一下離開,隨時呣記得家己生做啥款。25呣拘有啲詳細查考互人得著自由彼個完整的律法,閣有啲堅守的人,伊的所做一定會得著上帝賜福,因為伊有實在去實行,呣是聽了就呣記得。26若有人想講家己真敬虔,呣拘無控制家己的嘴舌,是啲欺騙家己,此個人的敬虔攏無路用。27照顧苦難中的孤兒寡婦,閣保守家己無染著世俗的腐敗,對父上帝看起來,這才是純全無缺點的敬虔。

雅各書

章 1 2 3 4 5

Please publish modules in offcanvas position.