彼得前書

章 1 2 3 4 5

第一章

  1我 —彼得是耶穌基督的使徒,我寫批互分散佇本都、加拉太、加帕多家、亞西亞、庇推尼等所在的流浪客。2恁受揀選是照父上帝預定的旨意,對聖神成做聖潔,通順服耶穌基督,閣對伊的血得著潔淨。 願上帝豐豐富富賜恁恩典及平安!

活活的向望

  3著稱讚咱的主耶穌基督的父上帝!根據伊無限的仁慈,通過耶穌基督對死人中復活,上帝有互咱重出世通得著活活的向望,4來承受伊為著恁保存佇天裡彼個袂朽爛,袂拍垃墋,袂消失的福氣。5這是欲互恁諸個通過信受伊的大能力保守的人,通得著準備佇終末的時機會實現的拯救。6為著按呢,雖然恁現在暫時猶著受種種的試煉心艱苦,恁著歡喜。7這是欲證明恁的信心堪得受考驗,比互火煉過猶會敗壞的金閣較寶貴,通互恁佇耶穌基督顯現的時得著稱讚、榮光,及尊貴。8恁雖然呣曾看著伊,嘛疼伊;現在無看見伊,猶久信伊。恁有用言語袂當表達極大的歡喜,9因為恁會得著信的結果,就是靈魂的得救。10關係此個拯救,預言恁會得著恩典許個先知已經有研究閣詳細查考。11怹得著佇怹心內基督的神對怹的指示,查考關係基督的受苦及後來得著榮光此個預言會佇什麼時,會按怎實現。12上帝有給怹啟示,互怹知怹的侍奉呣是為著家己,是為著恁。諸個事現在已經有靠對天來的聖神,通過福音的使者傳互恁;諸個事連天使嘛迫切啲聽候愛知。

聖潔的生活

  13所以,恁的心志著準備便,著警醒,全心向望耶穌基督顯現的時所欲賜恁的恩典。14著做順服的子兒,呣通照恁前呣識上帝的時啲放縱私慾。15呼召恁的上帝是聖潔,恁佇一切的行為嘛著聖潔。16因為聖經有記載:「恁著聖潔,因為我是聖潔。」17恁既然求叫用仝一個標準,照逐人的行為審判人彼位做父,就著用敬畏的心佇世間的日子作僑民生活。18因為恁知,恁受贖回脫離祖先留互恁彼款無路用的傳統,呣是用會敗壞的金銀,19是用彼位無缺點無污點的羊羔基督所流的寶血。20基督佇創造宇宙以前先互上帝揀選,佇此個末期才為著恁顯現。21恁通過基督信互伊對死人中復活閣賜伊榮光彼位上帝;按呢,恁的信及向望攏在佇上帝。22恁已經對順趁真理來潔淨家己,有純真的手足之情,就著用清氣的心對心底熱切相疼。23恁重出世,呣是對會敗壞,是對袂敗壞的種籽,就是通過上帝活活、永遠呣無去的話。24因為聖經有記載:人攏親像草,怹的榮華攏親像草花;草會焦,花會謝,25總是主的話永遠存在。 這就是傳互恁的福音的信息。

 

彼得前書

章 1 2 3 4 5

Please publish modules in offcanvas position.