猶大書

章 1

 第一章 

  1我是耶穌基督的奴僕,雅各的兄弟猶大,我寫批互許個受上帝選召,得著父上帝的疼,受耶穌基督保祐的人。2願上帝豐豐富富賜恁憐憫、平安,及慈愛!

假教師

  3親愛的朋友,我早就一直愛欲寫批互恁,及恁談論咱攏有份的拯救。我感覺此陣需要隨時寫批給恁鼓勵,愛恁為著上帝只有一遍就夠額傳授互伊子民此個信仰繼續奮鬥。4因為有一寡無敬畏上帝的人偷偷仔鑽入來咱中間,利用咱的上帝的恩典做放縱的藉口,閣呣認惟一的主宰咱的主耶穌基督。真早以前聖經就預言諸個人一定著受刑罰。5雖然恁知諸個一切的事,我猶久欲給恁提醒,主一遍就完全將以色列百姓對埃及地救出來,後來毀滅許個呣信的人。6閣許個無守本分,離開本位的天使,怹互鎖鏈永遠鍊佇烏暗的深淵;上帝給怹關佇遐,聽候審判的大日子。7住佇所多瑪、蛾摩拉,及附近城市的人,嘛及許個天使像款淫亂,放縱反自然的性慾,受著永遠袂化的火的刑罰,做眾人的警戒。8像款,諸個空思妄想的人嘛損害家己的身軀,藐視上帝的權威,侮辱天頂許個尊榮者。9天使長米迦勒為著摩西的遺體及魔鬼爭論的時,嘛呣敢用誹謗的話責備,只有講:「主譴責你!」10呣拘諸個人誹謗怹所無了解的事;怹親像野獸去做照本能所知的代誌,結果受毀滅。11怹慘啊!因為怹行該隱的路,閣為著錢財陷落佇巴蘭的錯誤。怹及可拉像款,因為背叛來滅亡。12怹呣知見笑,大食大飲,家己顧食,來破壞恁的愛餐。怹親像雲互風吹來吹去,攏無落雨;親像樹到秋天亦無結果子,互人連根摳起來,死甲焦硞硞。13怹嘛親像波浪噴出水沫,露出家己的見笑;親像離開軌道的星落入去上帝為著怹永遠保留彼個烏暗的深淵。14亞當的第七代孫以諾預言諸個人講:「恁看!主有導千千萬萬的聖天使來,15欲審判所有的人,刑罰一切無敬虔的罪人,因為怹用無敬虔的方法做一切無敬虔的事,閣講褻瀆上帝的話。」16諸個人不時嗷嗷唸,埋怨,趁私慾做代誌,講大話,為著利益扶挺別人。

警告及教訓

  17親愛的朋友,著會記得咱的主耶穌基督的使徒預言的話。18怹有給恁講:「佇末期,有一寡趁家己無敬虔的慾念做代誌的人會出現,怹愛恥笑別人的信仰。」19諸個是製造紛爭,受本性支配,無及聖神結連的人。20恁咧,親愛的朋友,著將家己建立佇恁至聖的信仰頂面;著靠聖神祈禱。21著踮佇上帝的疼保守家己,仰望咱的主耶穌基督的憐憫,直到得著永遠的活命。22對一寡心存憢疑的人,著憐憫怹;23有一寡人,著對火中給怹救出來;閣有一寡人,著憐憫怹,呣拘著家己警戒,連怹互情慾染著的衫都著厭惡。

頌讚

  24上帝會保護恁袂墜落,互恁無缺點,歡歡喜喜徛佇伊榮耀的面前。25願獨一的上帝 — 咱的救主,通過咱的主耶穌基督得著榮光、尊嚴、能力,及權柄,對萬古到現在,直到永遠。阿們!

 

猶大書

章 1

Please publish modules in offcanvas position.